Hudas Eskaryote
hinikay ni Loy Palapos
Ang nahitabo sa miaging Byernes didto sa kinadak-ang hawanan sa JJ’s Seafoods Village mao ang gihisgutan sa tanang mahiligon sa pamolitikang Bol-anon, tungod kay kini lahi sa daghang panghitabo nga sagad himoon sa mga banggiitang politiko nga gustong magpalapad sa ilang papel sa mata sa katawhan. Sa miagi (ug hangtud karon) atong nakita ang mga dagkong isda sa pangagamhanan nga naglamano, mipikpik sa abaga, may bear-hug pa, samtang ang ngisi abot sa duha ka dunggan…bisan sila may pagdumot sa usa’g-usa, ilabi na kon nagmatyag ang publiko. Nasaksihan nato kini sa makadaghan, ilabi na kon moduaw ang Presidente nga karon dili gusting molugak sa iyang gahum. Kapin sa unom ka tuig, o duha ka magkasunod nga eleksyon, ang gihambin nga kahiubos ug kasilo sa Gobernador ngadto sa Kongresista, tungod kay ang naulahi wa motuman sa ilang gikasabutan. Sa piniliay sa 2007 napildi lang gihapon ang Gobernador sa mga lungsod nga balwarte sa Representante. Apan wa niya ibulgar kining pagluib nga gihimo sa iyang ka-alyado.
Ang nakapabuto sa bulkan mao ang blizkrieg nga gihimo sa duha ka Kongresista nga gawas nga gimaniubra ang iyang certificate of nomination gikan sa ila mismong partido, gipatabanan pa ug alegasyon ngadto sa ilang mga kadagkuan sa partido sa Manila nga ang Gobernador dili loyal sa Lakas-Kampi-CMD. Sama sa KINILAW nga gisilihan pa gyod aron mosamot kalami, gipakontrahan pa ni Kongresista Cajes sa iyang asawa ang kandidatura ni Aumetado sa Segundo Distrito.
Mabasul ba si Erico Aumemtado nga sa maiging Araw ng Kagitingan, Abril 9, may mga suod siyang higala ug kauban sa partido nga gitawag niya’g Hudas Eskaryote? Wa na ba gyod siya makapugong mao nga may gibansagan siya’g “smiling assassin?” Usa ka tawo nga luto ang pahiyum sa atubang apan yawan-on diay ang tuyo? Maayo gani kay wa siya hagki ni Hudas.
Nakigpulong sa maong Grand Alliance for Bohol’s Sustainable Development si Atty.as Abapo, Jr., ang Provincial Administrator nga karon midagan pagka-Bise Gobernador, Atty. Julius Caesar Herrera, Bise Gobernado nga midagan pagka-Gobernador, ug si Atty. Dan Neri Lim, and Mayor saTagbilaran nga, kon basihan ang labing ulahing Bohol Poll sa HNU Research Center (diin nakuha niya ang 70% approval sa mga respondents sa survey, sa kang Toto Veloso nga 17%), siguro na sa iyang ika-tolong termino isip Mayor sa Dakbayan.
Ang tanang mamumulong madasigon nga gidawat sa bagang duot sa katawhan; apan ang labing gidayeg mao ang pakigpulong ni Mayor Lim. Mubo, derekto-ponto, maundanon, nakapakatawa sa tanan, sa iyang estilo nga sama lang nga nakighinabi siya sa katawhan. Kadaghanan sa mitambong mao pa’y pagkabati nila kang Dan Lim, sa atubang, maoy hinungdan sa ilang kaikag pagpamati sa matag pulong niyang litukon.Sa among lamesa, may nagkanayon…”Angay kaayo siyang mahimong Gobernador.
Unsa katinuod ang hungihong nga si Conching Lim sa Valencia mao na pod ang nasuko kay si Eladio Jala na sa Liberal Party and gipaluyuhan sa Kongresistang kandidato pagka-Gobernador aron mahimong iyang Bise Gobernador? Use kini sa mga hinungdan nga gusto ko sa politika. Sama sa KINILAW, kinahanglang daghan ang lamas ug panakot aron makapasamot sa gana.
*******
Who U?
Kinsa ang kandidato sa sa atong Dakbayan ug Lalawigan ang makasulti niining mosunod? Ug kinsa ang iyang gitumong?
Kandidato Uno: “Siya si Brutus nga mitabang pagpatay kang Julius Caesar aron mapanag-iya niya ang gahum. Siya si Hudas nga mihalok kang Hesukristo, dili timailhan sa pagmahal, kon dili pagbudhi sa usa ka tawong matarung aron lang siya makasapi, aron mapun-an ang iyang nag-awas-awas na nga bulsa sa katloan ka pilak. Siya ang mapahiyumong Mr.Clean, apan di angay saligan kay samtang ikaw iyang gigakus, may punyal nga idunggab sa imong likod.”
Kandidato Dos: “ Kining ilang grupo gimugna aron lipaton ang katawhan. Dili mga Mayor nga luuran ang makapadaug nako. My image is clean.”
Kandidato Tres: “ Kana siya, way baruganan. Daghan nang mga tuig ang milabay, milansar ‘ko, ug siya mipasalig nga iya ‘kong tabangan. Gihatagan ko siya’g kwarta. Unsa bang klasiha sa Kristyano…nga sa dihang ang pikas mihatag ug mas dako pang kantidad, nawala man ‘ko sa passing?. Matawag ba nato ni’g game-show nga “If the Price is Right?” Wa na lang ko magbanha, basta nahibawo na ‘ko kon kinsa siya nga matang sa higala.
Kandidato Kwatro: “Ila kong gibansagan ug Ukay-Ukay, ambut pagdayeg ba o kantalita. Apan sigi lang, miangay man pod ko. Bisan ang mga bata, Ukay-Ukay na ang ilang tawag nako. Naibawo ang tanan nga wa ko’y kwarta nga ipamalit ug balota.Ang akong gisaligan mao ang akong integridad ug katakos sa pag-alagad sa mga Bol-anon. Wa ko’y kontra, kay bisan ang akong mga kaparang akong giisip nga mga higala.”
Kandidato Singko: “ Ako migradwar ug MA ug PhD. Usa ka Abogado. Nahimong Board Member ug Kongresista. Ang akoing asawa Mayor, ang duha ko ka mga anak nahimong mga haligi sa Sangguniang Kabataan. Usa usab ako ka Pari. Unsa pa man ang nakuwang nga ako mahimong Mayor, samtang ang akong asawa mahimong Kongresista? Kanang mga nagyawyaw nga adunahan na ako karon, nasina lamg na sila.
Kandidato Sais: “Usa sa akong gitamdan sa akong pagpangalagad mao ang pagsulti sa tinuod. Dili usab ako sama sa akong kaatbang nga ang tibuok kalibutan nasayod na kon unsa ka doble-kara, maoy hinungdan nga gitawag siya’g smiling assassin. Diha’y pipila ka higayon nga kami si Gobernador di magkasabut, apan natural lang kana. Wa matibhangi ang among respeto sa usa’g-usa kay kami dili tigpakaaron-ingnon. Dili sama sa among kaatbang nga modunggab nga nagpahiyum.
*******
Quotes of the Week
“Our lives are books; and each day is a page. We can’t erase what has already been written; but we can always try tyo make the next page better.” (Texted by Dennis Du)
“Karon nga nakakita ug nakabati na ‘ko ni Mayor Dan Lim, di ko matingala kon awhagon siya sa kadagkuan sa Grand Alliance nga molansar pagka-Gobernador sa sunod nga eleksyon.’ (Ondoy G, a delegate at the GA launching)
“ Sir Loy, dis is nt original bt it fits GMA 2d: ‘Whom the gods wish to destroy, they first make drunk with power.’” (Texted by Rom Hordista)
Posted in Sashimi | No Comments »