Kwalipikasyon Sa Mga Lideres
BONIFACIO MAGBAGO QUIROG
Kung atong paminawon ang mga diskusyon sa telebisyon sama sa CNN ug Fox News makaingon kita nga nakaminus sila sa kwalipikasyon sa Presidente sa Afghanistan nga si Hamid Karzai. Apan segun sa ahong mga pagtuki dili tiaw ang kwalipikasyon ni Karzai. Migradwar siya sa Master in Political Science sa Indian University. Dili usab intelektuwal nga way kasinatian sa gubat si Karzai kay siya mismo miapil pagpanalipod sa Afghanistan sa dihang gisulong sila sa USSR pipila na ka dekada ang milabay.
Ang kaatbang usab ni Karzai sa miaging eleksyon sa Afghanistan nga si Abdullah Abdullah dili usab kabintahaan ang kwalipikasyon. Si Abdullah usa ka top student gikan sa elementary hangtud sa high school. Migradwar siya isip usa ka doktor sa Kabul University Department of Medicine niadtong 1983. Sa unang termino ni Karzai si Abdullah iyang gitudlo isip Minister of Foreign Affairs.
Pilipinas 2010. Si Noynoy Aquino gradwado sa Ateneo de Manila University sa law ug economics. Sama ni Barack Obama ang unang trabaho ni Noynoy mao ang pagpakighalubilo sa mga kabus pinaagi sa community organizing sa NGOs kon nongovernment organizations. Napili sya nga Congresista sa Tarlac sa tulo ka termino ug sunod nahimong Senador. Bisan nahimong Presidente ang iyang inahan nga si Cory wala kay isyu nga madungog nga siya nag-abuso. Si Mar Roxas senador usab ug giilang hanas sa ekonomiya ug natudlo na kanhi nga Secretary of Trade and Industry. Si Manny Villar usa ka certified public accountant, kanhi kabus ug nadato pinaagi sa pagkanegosyante, nahimong Speaker sa House of Representatives ug Presidente sa Senado nga mikanaug tungod sa mga isyu sa korapsyon. Si Loren Legarda gradwado sa University of the Philippines isip usa ka broadcast journalist, nahimong senador ug environmentalist. Si Gibo Teodoro topnotcher sa bar examinations ug natudlo ni Presidente Arroyo isip Secretary of National Defense. Si Edu Manzano ilado na kaayo, game ka na ba?
Bohol 2010. Si Julius Caesar Falar Herrera, practising farmer, abogado, nahimong City Legal Officer sa General Santos City, Legal Staff sa Senado ug Commission on Appointments, 3-termer mayor sa Calape, Outstanding Mayor ilabi na sa Coastal Resource Management, presidente sa League of Municipalities dinhi sa Bohol, 3-termer Vice Governor ug presidente sa League of Vice Governors of the Philippines. Si Tomas D. Abapo, Jr., 3-termer Provincial Board Member, abogado, Dean sa Holy Name University College of Law, ug nahimong Provincial Administrator sa administrasyon ni Governor Erico Aumentado. Si Edgardo Migrino Chatto, abogado, Outstanding Mayor usab sa Balilihan ug presidente sa League of Municipalities dinhi sa Bohol, midawat sa Dangal Ng Bayan award, 2-termer Vice Governor ug presidente usab sa League of Vice Governors of the Philippines, ug 3-termer congressman. Si Concepcion O. Lim, usa ka doctor of medicine, administrador ug tag-iya sa Leona O. Lim Hospital, 3-termer mayor sa Valencia, nahimong presidente usab sa League of Municipalities dinhi sa Bohol, 3-termer Provincial Board Member, National Treasurer/Chairman sa Provincial Board Members League of the Philippines ug Philippine Hospital Association ug karon Ex-officio Member sa Provincial Board isip presidente sa Liga Ng Mga Barangay sa Bohol.
Si Cesar “Buboy” Manhilot/Montano, taga-Baclayon, batikang actor ug direktor dinhi sa ato ug gawas sa nasud. Ilado na kaayo pinaagi sa Singing Bee nga makita sa ABS-CBN. Mi-promote sa atong probinsya ug kultura pinaagi sa iyang mga nindot nga pelikula sama sa Muro-ami, Panaghoy sa Suba, ug uban pa. Si Elpidio M. Jala, lumad nga taga-Loboc, doctor of philosophy in education, kanhi superintendente sa Department of Education dinhi sa ato, aktibo sa kalihukang kooperatiba, ug igsoon ni kanhi Congressman Boy Jala.
Mga Baruganan. Kung kwalipikasyon lang ang basihan, tabla-tabla ra ang atong gihan-ay nga mga kandidato. Pulos nato ikapasigarbo tanan. Apan ang tinuod nga liderato ari masukod sa baruganan. Unsa may ilang baruganan kabahin sa Corruption? Kabahin sa Global Warming ug Climate Change? Pagyatak sa atong Environment ug mga buhilaman? Unsaon man nila pagpauswag ang kinabuhi sa labing kabus nga Bol-anon ug dili ang ilang bulsa? Mobarug ba sila o molingiw lang kung makadawat na? Ayaw ko pangutan-a kay di man ko kandidato. I-ampo nato silang tanan nga sila giyahan sa Kahitas-an.
Alang sa mga daang kopya ning atong column, tan-awa sa Internet ang http://balitangmaayo.wordpress.com/.
Tags: Abdullah Abdullah, Afghanistan, Ateneo de Manila University, Barack Obama, baruganan, broadcast journalist, certified public accountant, Cesar “Buboy” Manhilot/Montano, Concepcion O. Lim, corruption, doktor, Edgardo Migrino Chatto, Elpidio M. Jala, Environment, Gibo Teodoro, Governor Erico Aumentado, Hamid Karzai, Julius Caesar Falar Herrera, Kabul University Department of Medicine, liderato, Loren Legarda, Manny Villar, Mar Roxas, Minister of Foreign Affairs, Noynoy Aquino, Presidente sa Senado, Secretary of National Defense, Secretary of Trade and Industry, Senador, Speaker sa House of Representatives, Tarlac, Tomas D. Abapo Jr., topnotcher, University of the Philippines, USSR
Posted in Balitang Maayo Qnahanglan! | No Comments »