Bunga sa Paningkamot o Badlis sa Palad?
Email This Article
“Sano, motuo ka ba sa badlis sa palad? Nga sa imong pagkahimugso nasulat na sa kabitoonan ang imong kaugmaon? Nga bisan unsa pa ang imong buhaton di na kini mausab?
Sa laing bahin, nagtuo ka ba nga ang kaugmaon sa usa ka tawo anaa sa iyang kaugalingong mga kamot? Nga depende sa iyang pakigbisog ang mahitabo sa iyang kinabuhi? That being happy is a choice?
Pinaagi sa usa ko ka column sa laing pamantalaan nakaila nako si Blas Garrote Romanillos, taga La Paz, Cortes, Bohol. Dili kasagaran ang iyang naagian, maoy hinungdan midako’g samot ang akong kaikag nga makita siya sa personal. Tua na siya manimuyo uban sa iyang pamilya sa Dasmarinas, Cavite. Ako siyang gidapit nga mobisita sa Bohol ug iya kining gisanong sa Pebrero 13 ug 14, diin siya akong na-interview sa akong programa sa DYRD-ZD (“Nangutana Lang” – 6:30 PM daily except Sunday).
Among gisumbalik ang iyang kaagi gikan sa pagkabata pa niya, sa panahon nga misimang siya palayo sa tanos nga dalan, hangtod sa iyang pagbalik sa kinabuhing matarong. Karon sa hamtong nga pangidaron, kanunay niyang gihandum ang mga kasal-anan nga iyang nabuhat, uban sa saad nga ang pagsubay sa lagda nga Kristohanon ug ang pag-alagad sa Makagagahum mao na ang lintunganay sa iyang pagpakabuhi.
Hilumon ug buotan si Blas nga mitungha sa La Paz Elementary School. Diha pa’y mga higayon nga, tungod sa iyang maayong pagdala sa iyang mga ginikanan ubos sa relihiyosong panimalay, mialagad siya sa simbahan isip usa ka kolitos o altar boy.
Apan may usa ka hitabo nga nakapausab sa pag-matyag sa mga tawo kaniya. Sa klase sa segundo grado, may usa ka tinun-an nga, human gamita ang usa ka eraser sa blackboard, gidabodabo kini sa dughan ni Blas aron limpyuhan. Ang hilumon nga bata nalimot sa iyang kaugalingon. Ginamit ang bungay nga iyang dala para sa gardening, gitigbas niya ang mabugalbugalon nga kaklase ug nasamad kini sa bukton. Dinhi nadiskubre sa mga kaila niya nga ang bata nga buotan ug way saba duna diay gitagong kaputong aron mobalos sa mga mapanamastamason.
Usa ka higayon siya ug ang iyang mga barkada wa mosulod sa klase. Isip silot gipahapa sila sa gwardiya ug gipatulod pinaagi sa ilang ilong ang sensiyo nga 25 sentabos. Isip panimalos ilang gibato ang eskuylahan ug sila napriso. Sukad niadto, sulod-gawas na siya sa prisohan, ilabi na sa iyang pagka-teenager dihang nahimo siyang durugista ug banggiitaan nga kawatan. Kon may kawat ug sinukmagay o kagubot sa Cortes, siya na ang kanunay gipasanginlan.
Sa usa ka insidente, nalimot na usab siya sa iyang kaugalingon tungod sa druga ug nakadunggab siya. Ang silot: upat ngadto sa unom ka tuig ug usa ka adlaw bilanggoan. Sa BDRC giila siya nga dilki ordinaryong piniriso, kay sa kanunay ma-headline ang prisohan tungod sa riot o kagubot, nga human sa mga pakisusi, si Blas Romanillos ang usa sa mga nangulo. Gibalhin siya sa Muntinglupa nga gikadenahan ang tiil; ug didto misamot ang iyang pagkamalapason sa mga lagda. Bisan ang bartolina wa makakibhang sa iyang pagka-notorious.
Usa ka higayon, mipuga siya sa Munti ug, ginamit ang ngalan nga Blas King, nahidiindiin siya pagtago. Didto siya sa Bikol, Laguna, Bulacan, sa Kabisay-an, ug uban pang mga dapit, kay di siya mahimong magdugay sa samang lugar. Lainlain ang iyang trabaho, wa siya’y gipili. Apan bisan sa iyang pagbalhinbalhin, gimatoto gihapon niya ang damgo pagkab-ot ug edukasyon; maoy hinungdan nga mi-enrol siya sa usa ka Correspondence Course sa Arkitektura.
Apan taas ang kamot sa balaod. Sa usa ka pagbisita niya sa Bohol, nasikop siya pag-usab ug gibalik sa bartolina sa Muntinglupa. Nakaila niya ang laing Bol-anon sa Death Row, nga maoy nakapadasig kaniya pagbalik sa Diyos. Sa usa ka Bible Study nga milungtad sa kaadlawon, gitahan niya ang iyang lawas ug kalag sa Makagagahum piniyong ang iyang mga mata. May nabatian siyang katugnaw nga way sama; ug sa dihang iyang gibuka ang iyang mata, nakita niya ang image ni Berhing Maria, nga nawala lang usab dayon sa usa ka pamilok.
Sukad sa maong hitabo, gibug-os na niya ang iyang kasingkasing pag-alagad sa Diyos nga way kondisyon. Miuban siya sa El Shaddai ug nahimong Pastor. Sa iyang pagsabwag sa pulong sa Diyos sa daghang mga lalawigan ug dakbayan sa Pilipinas ug sa laing nasod sama sa Hongkong ug Canada, wa niya itago ang iyang madulom nga kaagi.
Laing talento nga iyang nadiskubre sa prisohan mao ang pagpintal. Iya kining gihatagan ug panahon aron molambo, ug karon daghan na siya ug mga obra nga nakaangkon ug pagdayig. Nakita nako ang pipila niya ka mga pinintal, ug akong nasuta nga ang tima sa pagbalik sa Diyos ug iyang mga naagian mao ang kanunay nga mopasulabi.
Ang kanhi maton sa Cortes usa na karon ka Pastor ug Pintor, ug malipayon uban sa iyang banay nga nanimuyo nga malipayon sa Dasmarinas, Cavite. Ang kinabuhi ni Blas Romanillos maoy tubag sa tanghaga nga Kristohanon: nga ang Diyos wa mosalikway ni bisan kinsa, nga ang tawo ang misalikway Kaniya, apan Iya lang gihapong gidawat kon siya mobalik sa Iyang kiliran.
(Email/Text you reaction/jokes/messages/quotes to this column. Email address: loy_pal@yahoo.com. Gmail addrees: loy.pal@gmail.com. Website: www.loypalapos,com. Cell: o9498345957)
